توبيكاتى من حياتى

ازيكم النهارده

بعد موضوع يوميات مشاكس

والاستعداد لليوميه التانيه


قولت اكتب التوبيك ده الاول


حسيت انى محتاج اكتبه كتير



بس انا عارف ان عنوانه جديد وغريب


العنوان بالنسبه لى حيرنى جدا

كنت محتار انى اكتبه بعنوان واحد من اتنين

الاول


توبيكاتى من حياتى

او

حياتى توبيكات


بس استقريت على الاول الحمد لله

حسيت انى عاوز اكتب حاجات من حياتى فى توبيكات


لان العنوان التانى معناه انى اكتب كل شئ فى حياتى

عاوز بجد اكتب عنى وعن محمد وابراهيم ومصطفى

واكتب كمان عن رحاب ورنيا ومنى وايمان ونغم و أيه

عاوز لما اكتب توبيك
اخد عنوانه
من على لسان ست كبيره

او راجل عجوز

او بنت صغيوره

او كمان

طفل بيلعب بالكوره

او شاب قاعد يذاكر

او

بس المهم فى الاخر

انى اخده من حياتى

انا حابب انها تكون دعوه عامه

اننا نكتب من حياتنا

نعبر عنها

نعبر عن كشاب

زهقت خلاص من الموضوعات الكتير

اللى بتنسيق كبير

بس فى الاخر هى فين وحياتنا فين

انا من الوقتى

هكتب توبيكات من حياتى

او من مواقف عشتها او شوفتها


يلا مين يقول انا معاك

ونعبر بجد عنا وعن حياتنا

يوميات مشاكس .................. قانون المرور الجديد

نبدا بقى


بسم الله

استعدوا معايا


هحكى القصه من بداتيها لحد النهايه


من اول


كام ضغطه على الكيبورد


لحد ما

وصلت


للوقوف قدام وكيل النيابه



بس خليكم معايا للاخر


يمكن اطول شويه صغيرين



.................................................. ................


المره دى

بتبددا من على الجهاز بتاعى فى غرفتى العزيزه

هى مش عزيزه اوى يعنى

وانا بتصفح النت


لقيت واحد صحبى بيتكلم عن قانون المرور الجديد فى مصر


ماشى يا بتوع المغرب


وفعلا عجبنى كلامه وهو كلام زى الفل

قررت اتابع التوبيك ده

لقيته بيتكلم انى لى حقوق كتير فعلا ضايعه

وحاجات تسهل على مواقف كتير فى حياتى

وانى اللى بقابل مواقف كتير بسلبيه

شويه ولقيته بيتكلم انه عمل محضر لسواق تاكسى

شويه كمان واحد تانى مع سواق سرفيس

او زى بتوع اسكندريه ما بيقولوا عليه

مشوار

( نفسى افهم ليه الاسم ده )


المهم قرارت شويه فى القانون الجديد

والمخلفات والعقوبات

من على موقع مصرواى

علشان اللى يدور على القانون الجديد

اول يوم يجى فى دامغى اطبق بقى القانون

كنت مروح البلد وانا فى الموقف

السواق مش راضى يمشى ولازم العربيه تكمل اربعات

طبعا الناس بتوع مصر هيعرفوا دى اوى

وانا يومها كان مزاجى زى الزفت

ومش طالبه خلاص رخامه سواق مكروباص كمان

المهم دماغى سخنت

حتى الترومتر بتاعها يومها بقى عالى اوى

وقفت للسواق

هتتطلع يا اسطى على الوضع الحالى

قال لى لا

قولت ليه وانا هروح على المرور اشتكى

بعد شويه كلام نزلت من العربيه

واخدت رقمها

واتكلمت مع السواق وانه بيقول لي انه هيجيب المحضر ويقطعهم لانه معاه واسطه


على فكره موضوع الواسطه ده وحش اوى

موجود فى كل مكان

حتى على البلوج هتلاقوا فى مواضيع بتخانق علشان الواسطه بتاعتها

بس فى الاخر العربيه طلعت من غير اى واحد ركب زياده

وده حق الناس


بس للاسف يومها مش ركبت فى العربيه دى

وطلع عينى علشان اركب بعدها

بس فرحت انى عملت خير فى الناس وان السواق خاف وطلع

ويومها حسيت انى ممكن اغير فى البلد دى

بمواقف صغيره وتكون احسن وفرحت جدا

وطبعا روحت البيت زى اللى عامل انتصار

عرفت اطلع عين سواق ميكروباص

ولقيت انى ممكن اخد حقى بقى

طالما هو الوضع كده

بس يومها عديت الموضوع وكبرت دماغى من انى اروح اعمل ليه شكوى

لانه حمل وطلع طبيعى بقى

وخصوصا ان الغرامه هتكون 300 جنيه فى البتاع ده

الموضوع كله بقى


بدأ فعلا يسخن فى دماغى

وخصوصا الزحمه البشعه اللى بقيت فيها المنصوره بلدى الجميله


مش اى بلد يعنى


شويه واسمع عن محاضر للسواقين التاكسى

وانى من حقى فعلا اوقفه

واقول ليه روح كذا وهو يروح غصب عنه

طلع فى دماغى اجرب بقى فى تاكسى


وانا نازل من الشركه حبيت اروح الموقف اللى بروح منه

قولت هجرب فى تاكسى

شاورت لتاكسى

راح ركن

فتحت البابا ودخلت

فالسواق بمنتهى قله الزوق على فين يا استاذ

مش تقول الاول

رديت بقى برخامه اكبر

هو ده مش حقى اركب وانت توصلنى

رد قال لى على فين بقى

كان ناقص يقول يا عم الرخم

بس على مين دا انا طلعت الرخامه كلها عليه اصبروا بس

قولته موقف الدرسات

قالى مش رايح

رديت يا اسطى بعد اذنك موقف الدرسات

قال مش رايح

رديت يعنى انت ممتنع عن توصيلى

قال ايوه مش رايح الدرسات

قولته خلاص مع السلامه نتقابل فى مباحث المرور

وعلى فكره غرامه الامتناع عن التوصيل 300 جنيه وسحب رخصتك الشخصيه شهر


ونزلت اخدت الرقم ووقفت شويه

وهو بدأ يمشى وانا باخد الرقم

مشى تقريبا 20 متر

ومره واحده وقف

وشاور لى انى اروح ليه


بس ايه بقى

كنت حابب ارخم اكتر

وقفت

لقيته بيرجع بالتاكسى

وبيقول لى اتفضل

ركبت جنبه ومشى بقى

وهو بيطلع قولته لو سمحت يا اسطى شغل العداد انا هحاسب على اللى العداد يقوله

وده طبعا عمره ما بيحصل فى اى مكان

بس قولت هطلع فى السواق بقى كتير علشان رخامته

طول الطريق بقى

وانا مطلع عينى

يجى يقف لحد

اقول ليه مش من حقك انك تركب حد معاى بس هعديها بمزاجى

ركب اللى تحبه

بحرق دمه بس زى ماهو متعود يحرق دم الناس


شويه واتنين بيشاروا ليه

وقالوا ليه الدرسات

رفض لانه عاوز كل واحد لوحده

فقلت بصوت عالى

لو كانوا يعرفوا حقهم كان الموضوع خلص

ولانهم بنات طبعا وقفت ومش قدرت اعمل ليهم شئ

طول الطريق بقى من ده

بس وانا فى الاخر

طلعت ليه فلوس اكتر من اللى فى العداد الطبيعى بتاع الناس

حركه كويسه بعد ما حرقت دمه طول الطريق

والطريف ان فى الطريق بتاعى اداره المرور

فسالته هو مدخل ومبنى المباحث فين بالظبط

طبعا اتخنق اوى

بس على مين

دا انا كنت مشغل جزء الرخامه فى الدايره الالكترونيه

نيجى بقى فعلا لليوم الحاسم


يوم الجمعه 7 نوفمبر 2008


كنت فى فرح مع اختى


وانا طبعا ولا اعرف مخلوق فى الفرح غير اختى

وهى سابتنى ومشيت راحت للعروسه صاحبتها واتخرت على كمان



المهم مشينا بقى من الفرح


بعيدا عن ان الفرح كان فى نادى بعيد جدا

وكمان بجوار مصنع السماد والدخان والاتربه

بجد صعب على ناس كتير بيعيشوا هناك


المهم بقى

هنروح انا واختى على موقف الدرسات السابق ذكره

برجاء راجع خريطه مدينه المنصوره




المهم


بوقف تاكسى باحترام واقول ليه قبل ما اركب

رفض ومشى ومش عبرنى


قلت ايه هى مش هتنفع غير بقله الادب والرخامه

وقفت تاكسى وركبت اختى وركبت انا كمان

التاكسى على فين

على الدرسات

بيقول لى مش رايح هناك

انا رايح امون من البنزينه بتاع الغاز اللى فى المكان الفلانى

رديت فى واحده زيها فى الدرسات

وبعد اذنك يا اسطى انا هروح الدرسات او المرور


لقيته ركن بالتاكسى

ونزل ونزلى انا كمان

( الحته دى هى كمان مخالفه )

وقعد بقى يزعق ويشتم

سبته براحته خالص

وحلفت انى اعمله الادب والاحترام

لان ده حقى وهو اخده منى

مشى هو

وبعدين وقفت تاكسى تانى

وطلع راجل محترم وروحت


طلع بقى فى دماغى انى اجيب حقى

دورت على النت

وعلى موقع وزاره الدخليه

وكتب فيه شكوى

شويه ولقيت نفسى مش مستريح

كلمت 122 وقولت ليه على اللى حصل

رد وقال كنت كلمتنا فى وقتها وكنا جينا على طول

على فكره هما هيجوا فى الحاله دى غصب عنهم

برده مش استريحت

كلمت رقم اداره المرور

وده كان الساعه 11 تقريبا بالليل على الرقم الارضى بتاعهم


وسالت اعمل ايه

رد على واحد منهم

وقال لى تيجى الصبح عند واحد مش فاكر اسمه تقريبا فرغلى او حاجه زى كده

وتعمل ليه محضر


طبعا الصبح ده كان يوم سبت

وانا بقى رايح على الكليه

قولت هروح على المرور اخلص على الموضوع ده

وفعلا روحت على المرور

وسالت على مباحث المرور

ودخلت

ايوه طلعوا عينى علشان اقدم المحضر


( بس فى حاجات لو حصلت هتخليهم مجبرين على عمل المحضر )

ممكن نتكلم فيها فى وقت تانى

عملته

بس قولت لازم اخلى السواق ده يتعلم الاحترام


فقمت ثابت المحضر بتاعى فى الدفتر بتاع المحاضر

علشان مش يكون مجرد ورقه وتتقطع ب 50 جنيه مثلا

واخدت الرقم وسالت اتابع المحضر ازاى

طبعا كل ده يوم السبت تقريبا الساعه 11 الصبح

لسه سخن بقى

روحت على الكليه

وزى اللى فتح عكا


وحكيت لصاحبى على المحضر واللى حصل


وكان هناك اراء كتير

ناس موافقه على عملته وان ده ايجابيه منى

ودول هيبقوا اعضاء

VIP

وناس تانيه

ممكن يكون مطرودين

خلوا بالكم

المهم كملت بقيت الاسبوع عادى

يوم الخميس الاقى رقم بيرن على الموبيل بتاعى

بصراحه الرقم عجبنى فطلبته

تانى


لقيت الرقم خاص باداره المرور

وبيكلمونى عن الشكوى اللى على موقع وزاره الدخليه

اتكلمت معاه والمفروض انى اروح يوم السبت اللى هو الاسبوع ده علشان اكمل الشكوى

يوم السبت كان امتحان

رياضات 5

وحسبى الله ونعم الوكيل

مالها تجاره او اداب

خلصت الامتحان

وقعدت كتير متردد اروح ولا لا


المهم نزلت وقفت تاكسى

بطريقه حقى وحقك

انى حقى اروح

وخد حقك اللى انت عاوزه


وكده كده انا رايح المرور هعمل ليك المحضر والمخالفه ومش فارق معاى

وفعلا روحت اداره المرور

ودخلت المباحث


روحت للناس بتوع المباحث اللى مسؤلين

مجرد بقول انا اسمى كذا

اللى مقدم الشكوى اللى على النت فى تاكسى

لقيته بقول لى ايوه يا احمد وكمل الاسم كامل للاخر الاب والجد والعيله

التاكسى رقم 27026

لا خلاص احنا خلصنا موضوع الشكوى

حسيت ساعتها انه بيكلم علم من اعلام مباحث المرور

عارفين وفاكر التفاصيل كلها

بعد كده اكتشفت انه مش بمزاجه

لان الموضوع جاى ليهم من وزاره الدخليه مباشره

والوزاره هتسال عن اللى حصل

معناها ان اللى واقف قدامه واحد فاهم

وعارف هياخد حقه ازاى

ومش اى حد

ده وصل لموقع الوزاره

سبته وخرجت

وكان نفسى اعمل محضر لتاكسى تانى

بس للاسف كلهم بقوا كويسين الوقتى

فعلا مش هزار


معاى على الاقل

ومع الناس اللى اتبعت الاسلوب ده

اصل مخالفه الامتناع لوحدها


300 جنيه


ما بالكم بالمحضر بتاعى كان 3 بنود

1- امتناع عن التوصيل

العقوبه 300 جنيه وسحب رخصه شهر

2- انزال من التاكسى

3- سب وقذف
هما بيسموا الكلام ده كده

ودى لوحدها قضيه جنح وبيروح نيابه ومحكمه


وانا بقى خارج من الاداره زى بالظبط اخو اللى فتح يافا



الاقى واحد بيوقفنى

وطلع اخو السواق اللى عمل معاى المشكله


المهم بقى

اخو السواق

ومعلشى واحنا اسفين

وكلام كتير

انا عارف انه بيثبتنى

المهم وافقت

بس بعد ما اتاكدت ان فعلا السواق

طلع عبينه صح

وفعلا اتعلم درس حقيقى


قولت هتنازل خلاص

علشان خاطر انه تعبان بجد

وبنته وكلام كبير كده مش هشغلكم بيه

اصلى انا بس اللى هتثبت

المهم خلاص هنعمل تنازل

نروح نتازل

مش هينفع من هنا

لازم مباحث قسم شرطه طلخا

طلخا ده اسم المكان اللى كان فى الواقعه

وهى مدينه مقابله للمنصوره على الطرف الاخر للنيل


المهم خلاص انتظرت كتير يومها

بس كنت فرحان

حته الجنون الصحفى بتاعى اللى نفسى اعمله ديما

روحنا القسم

ولما دخلت فرحت جدا

اول مره اروح قسم بقى

شوفت الحجز

بس مش دخلت لسه


هدخله قريب

و هكتب ليكم من هناك اوعوا تقلقوا


طيب اتنازل يقولوا لا

مش هينفع تتنازل هنا لازم فى النيابه

بس فى الساعه دى كميه الواسطه والكوسه كبيره اوى

ممكن نتكلم عنها

بس لو اتكلمت



وفعلا ساعتها هبقى ببعت ليكم من الحجز

ما علينا


طبعا النيابه الساعه 7 مساءا

وتقريبا الوقت ده كان لسه الساعه 4

المهم هروح واجى

شوفوا بقى معامله اخو السواق لى

بيوصلنى ويوقف لي تاكسى ويحاسب كمان

معامله اخر حلاوه

لانى عرفت اخليه يحترمى

وازاى انى كنت هجيب حقى من غير المحضر لو عرفت يطلع منه
وكلام كبير بقى من بتوع انك ترسم شخصيك عليه

روحت البيت

فتحت العبد
تانى

واستغربت انه كان مقفول

فسالت اختى


قالت لى هو قفل لوحده

افتكرت انه كان بيدونلود وخلص وقفل بس

على فكره ده العبد يعنى الجهاز بتاعى اللى بكلمكم من عليه

المهم قعدت شويه

وبعت كام ميل وكتب شويه حاجات

واطمنت على البيت بتاعى على النت



المفروض بقى انى هنزل من البيت على الساعه 6

علشان اروح النيابه

بقول لوالدى انا خارج رايح النيابه

طبعا قلق جدا

وقعد يحقق معاى

وقرر يجى معاى لانه خايف ان السواق ده يعمل معاى حاجه مش كويسه

وهو عنده حق فى خوفه ده

المهم روحوا القسم تانى

ومنه فى تاكسى على النيابه

طبعا سيبكم انه اسوء تاكسى ركبته ولو كنت لوحدى كنت عملت ليه

مليون مخالفه

لانه سواق اقل كلمه تقول عليه انه مش بيحترم المكان اللى هو فيه

هو والعسكرى بتاع قسم الشرطه اللى كان مع السواق اللى عملت معاه المشكله


كلام فى منتهى قله الادب

بس والدى موجود فمش هينفع اتكلم

المهم روحنا النيابه

وطبعا عاده حلو فى المصيرين

ان عسكرى القسم رغم اسلوبه الوحش جدا

والشئ جدا
بيحاول

يتاكد من اننى انا والسواق بتاع المشكله

خلاص هنتازل

وفعلا عجبنى فيه ده


طلعنا لوكيل النيابه

كان بتكلم معانا

من منطق انه احسن مننا كتير

بس انا متاسف

رديت باسلوب مشابه ليه بس مش مستفز لانه وكيل نيابه برده

خلصنا كل شئ

واتنازلت ومضيت باسمى

الواحد مضى كميه امضاءات كتير فى المحضر ده بس كله فى سبيل البلد دى

فعلا كله فى سبيل اصلاح البلد دى


انا وانا بعمل كل ده عارف ان ربنا هيسالنى انت بتعمل كل ده ليه
هقول ليه علشان اصلح فى المكان اللى انا فيه

وعلشان اشوفه احسن كتير

بجد

لو شوفتوا السواق ده واهله كلهم والده واخوه وقريبه وهما بيتكلموا

انه عمرهم ما هيعمل كده تانى

صدقونى هتعرفوا ان ممكن بلدنا تتصلح كتير كمان

بس احنا نحاول

مجرد محاولتنا عند ربنا دى شئ كبير جدا

انا كده خلصت الحكايه

هكتب بس زى تخليص مش اكتر

اسف على الاطاله

ربنا مع اللى ناوى يقرا وراى

هيتعذب

الاول

الهدف


هدفى وبصراحه مطلقه

انى اصلح فى بلدى علشان احقق فيها نهضه

ولما يكون عند ابن يلاقى بلد وحياه كريمه يعيشهم

لانى انا تعبت جدا من حاجات كتير



ثانيا الدوافع

على اساس انى بقيت مجرم بقى ونيابه وقسم ومباحث

بجد كان اكبر سبب عندى

ان السواق ده وجه لى اهانه شخصيه

وتتطاول على فى الكلام

ده كانت نقطه الفصل الرئسيه

وكان فى سبب برده كبير جدا

ان ده حقى

وانا مش عاوز اسكت عنه

لان الساكت عن الحق شيطان اخرس





ثالثا النتائج

بعض النظر عن اللى 200 جنيه او 150 جنيه

اللى دفعهم السواق

ومش رسمى كمان

يعنى فى المرور علشان العسكرى اللى واخد الرخصه يطلعها ليه

وكمان علشان العساكر اللى فى القسم

وكمان انه اتعطل يوم كامل

بدون شغل

ودخل الحجز لاول مره

انا شايف انه اتعلم درس قوى جدا

انه لازم يحترم الناس

وحتى لو مش اتعلمه المره دى

لو اتكرر معاه تانى هيتعمله اكتر واكتر


بالنسبه لى انا

اولا استريحت انى اخدت حقى

ثانيا حاولت اغير واصلح فى مجتمع معاى وبيعش معاى

ثالثا عشت تجربه جديده اول مره اعيشها شوفت فيها كتير

رابعا انا خلصت ضميرى وطلعت من نقطه السلبيه اللى الايجابيه



اخر حاجه بقى


المفاجاءه

انى كده خلصت

كلام كتير

عارف ان فين بتاع 3 او 4 قضايا هيترفعوا على الوقتى


سلام بقى

منتظر تعلقيات كتير